कैलारीके हौसलपुर गाउँ फे ओजरार हुइना

थारु टेलिभिजन ३० भाद्र २०७७, मंगलवार
कैलारीके हौसलपुर गाउँ फे ओजरार हुइना
Share with Friends

धनगढी, ३० भदौ । नेपाली सीमाके पहरेदारके रुपमे बसोबास करटी
आइटी आइल हौसलपुरबासीनके यिहे डशियासम बत्ती बरना इच्छा पुरा हुइना हुइल बा । नेपालबासीहुक्रेफे यहाँके सरकारी सेवा सुविधाके कबु अनुभूति करे नइपाइल कैलाली जिल्लाके कैलारी गाउँपालिका–७, हौसलपुर गाउँमे डसियासम बत्ती बरना तयारी हुइटी रहल वडा कार्यालय जनैले बा ।
विद्युत विस्तारके लाग हौसलपुर गाउँसम तार टानके ट्रान्सफर्मर समेत जोरना काम होसेकल वडाध्यक्ष कमल चौधरी जनैलै । ‘हौसलपुरबासी ऐनानीप्रतिमे बसोबास करटी रहल ओरसे मिटरके लाग वडा कार्यालयसे सिफारिस होसेकल बा,’ वडा अध्यक्ष चौधरी कहलै, ‘धरौती ओ मिटरके लाग पैसा उठाइल कहल बा, ओइने जटरा हाली करही ओटरे जल्डी बत्ती बारे सेक्जाई ।’
सरकारी सेवा लेहक लाग जग्गाके लालपूर्जा, नागरिकताके फोटोकपी आवश्यक परठ । मने नेपालभूमिके रक्षा करटी आइल हौसलपुरबासीनसे जोटखोड करटी आइल जमिनभर ओइनमे नाउँमे दर्ता नइहुइन । जिहीसे ओइने ढेर सरकारी सेवा सुविधासेफे बञ्चित हुइटी आइल बाटै । विद्युत सेवा विस्तारसंगे मिटरके लाग भर वडा कार्यालय सिफारिस करले बा । मने अब्बे ओइने मिटरके लाग आवेदन फाराम नइ भरले हुइट ।

हौसलपुरमे ३५ घरधुरी रहल बा मने टमान जानेक नागरिकता अपन घर नइहुईन, बहुट जाने रोजगारीके क्रममे इण्डिया गैल बेला उहे छोरले बाटै ।
हौसलपुरबासी जटरा हाली मिटरके लाग आवेदन फराम भरही ओटरे हाली विद्युत चार्ज करे सेक्ना नेपाल विद्युत प्राधिकारण कार्यालय धनगढीके सुपरभाइजर नेहा दत्त जनैली । उहाँ कहली ‘हौसलपुरबासी ऐलानीप्रतिमे बसोबास करठै कलेसे वडा कार्यालयके सिफारिस, नागरिकताके फोटोकपी, ओ धरौती स्वरुप एक हजार रुप्या धारके मिटरके लाग आवेदन भरे सेक्ही ।’
‘हौसलपुरसम विद्युत विस्तारके काम अन्तिम चरणके बेला हम्रे अनुगमनफे करले रही,’ सुपरभाइजर नेहा कहली, ‘आब विद्युत चार्ज कैना बेला फेरसे जैबी, उहाँहुक्रे मिटरके लाग सक्कु प्रक्रिया पुगाके मिटर लैजैही कलेसे उहे बेलासे बत्ती बारे सेक्ही ।’
हौसलपुरबासी यातायात, खानेपानी, विद्युत, खोप केन्द्र, विद्यालय नइरहल समस्या भोग्टी आइल हौसलपुरके गोमा चौधरी बटैठी । उहाँ कहठी– ‘गाउँमे ग्राभेल नइहो, अब्बे बर्खाक बेला हिलाकिच्चासे नेंग्ना कर्रा, पाछे धुर उरठ । भूमि नेपालके रहलेसेफे बर्खाक बेला अपने देशमे पूर्णरुपसे सम्बन्ध विच्छेदके अवस्था आइठ ।’ बस्ती मोहना लडियक पार रहल ओ खेतुवा भर दुसर पार रहल हुके खेतीपाती कैना समेट समस्या परल उहाँ कहली ।
उहे गाउँक रामकुमार चौधरी गाउँ बोर्डर किनारमे रहल ओरसे भारतियहुकनहे ढेर समस्या भोगे परल बटैलै । गाउँपालिकासे डेहल लाउ चलैनाफे एसएसबी से रोक लगाइल उहाँ बटैठै । झोलुङगे पुलके सर्वे हुइल मने काम
हाली सुरुवाट हुइलेसे समस्यासे दुर हुइना उहाँ कहलै ।
हौसलपुरके प्रतिभा चौधरी अपनेहुक्रे नेपालीहुकेफे कबु आयमुलक, सीपमूलक ओ कृषि तालिम नइपाइल गुनासो करली । ‘प्रौढ शिक्षा समेट नइपाइल कारण हस्ताक्षर करेफे नइजन्ठी,’ उहाँ कहली– ‘अपन गाउँमे विद्यालयमे नइहो लर्का सब भारतीय विद्यालयमे पह्रठै ओ हिन्दी भाषा बोल्ठै ।’ अब्बेक पिढीके लर्का अपन मात्रृ भाषा विस्रैना समेट चिन्ता रहल उहाँ कहली ।
कैलारी गाउँपालिकाके अध्यक्ष लाजुराम चौधरी मोहना लडियामे झोलुङे पुलके लाग केन्द्रसे टेन्टर हुइना बटैलै । टेन्टर प्रक्रिया पुरा हुइटीकी यिहे आर्थिक बरससे झोलुङे पुलके निर्माण सुरु हुइना उहाँ जनैलै ।